أمن الدولة ............. رائعة مواطن طهقان (( خش بقلب جامد )

    شاطر
    avatar
    cute boy
    عضو ماسى
    عضو ماسى

    ذكر
    السمك عدد الرسائل : 3433
    العمر : 24
    العمل/الترفيه : basket ball player
    المزاج : feeling lovley
    تاريخ التسجيل : 18/08/2008

    إعلان أمن الدولة ............. رائعة مواطن طهقان (( خش بقلب جامد )

    مُساهمة من طرف cute boy في 3rd أكتوبر 2008, 1:00 am




    خلى قلبك جامد ومتخافش

    المواطن طهقان أوى وكان بيكتم فى نفسه أوى


    واقف عندك تعمل إيه ؟

    أنا باتمشَّى ف حالي يا بيه !
    هم الدنيا كله عليا
    وانا باتعان بالمشي عليه ..
    إسمك إيه ؟
    والله مافاكر ..!
    إسمي مواطن
    إسمي مواطن مصر الصابر ..
    كده كتبوني ف كل دفاتر
    كفر اليتيم
    مركز متاعيس البلدية !
    أنا من ذات نفس المُديرية !
    من مواليد الزمن الغابر
    جيل الثورة والإشتراكية
    سمُّونا .. جيل الحُريّة
    إحنا الجيل العربي الثاير
    جيل الفكر الشرقي الكافر ..
    جيل السد ..
    ومكاسب شعب ما تنعد
    جيل التأميم والإصلاح
    جيل العامل والفلاح
    إحنا يا باشا إللي بننحط
    مطرح ما تقولوا وبالظبط
    ولا حدش فينا بينحاز
    ولا حدش بيفك الخط
    أنا عشت الأيام السودة
    كُنَّا بنطفِّي النُور ف الأوضه
    وقت الغارة
    ونهيَّص من حارة لحارة
    طفُّو النور .. طفُّو النور
    وترُشِّنا بالميه .. الجارة
    قالوا أنا مولود بعد الهوجة ..
    ف عهد النصر !
    فيه ناس قالوا ف عهد القهر..
    قالوا انا جيت وف ديلي الفقر
    تلاقيك عارف كل القصة !!
    مش برضه سعادتك هنا من مصر ؟؟!
    مش راح أطوِّل
    اُمي الغالية فطمتني
    بعود صبَّار
    وانا كان عُمري يدوبك
    شهر !
    من يومها وأنا برضع صبر !
    من يومها يا سعادة الباشا
    وانا ريقي مبلوع بالصبر
    يديكى الصحة يا أمى ياطاهرة
    ويوسَّع حواليكي الدنيا
    عُمري ما قُولت لمأمور
    لأ
    ولا بَعرف غير أقُوُل الحق
    وبصلّي ..
    وفحالي تملِّي ..
    ولا بأسمع أخبار اليوم
    شئ ماله لزوم
    لو حد إتكلم ف سياسة
    بأقعد على طول مكتوم
    أو ألملم حالي
    وأقوم
    من غير تعليق !!
    ليه بس يا باشا مجرجرني
    ف محضر تحقيق ؟؟
    دا أنا واحد من ضمن الفُقرا
    لا بنكتب حتى ولا بنقرا
    وبندعى .. للريّس دايماً
    و بنهتف .. للسادة الوزرا
    وخدمت الجيش
    وأحلف لك :
    م الليلة..
    مش حخرج تاني
    صدقنى .. وديني
    وأيماني
    غير بس أدوَّر ع اللقمة
    ورغيف العيش
    ده أنا طيّب حاضر
    ف لساني
    غير بيتي ما ليش
    وعيال بالكوم
    ركباني هموم
    كراريس ومدارس
    وهدوم
    والرزق بيجي بميت واسطة ..
    غير كده .. ما ألقيش
    وانا عايز أعيش
    نفسي أهرب من الدنيا بحالها
    أطفش .. ولا أجيش
    الدنيا يا باشا لأمثالنا
    غير صَحن الذُّل ما تدِّيش
    وانا راضي وصابر
    سيِّبني أروح ..
    أصل أنا مش قادر
    يجعل بيتك دايماً عامر.

    أمن الدوله
    شكلك صعلوك وبتتآمر!؟
    متمسكن والدمعه ف عينك
    شُغل النسوان مش حيفيدك
    لو فاض صبري ح كلبش إيدك
    عامل فيها البت البكر ؟؟
    راسم عفَّه وطيبه وطُهر ؟؟
    عُمرك شوفت نجوم الظهر ؟؟
    إحنا مباحث أمن الدولة
    إمش إنجر وأي مُحاولة
    راح ألبِّس أُمَّك أجدع بلّوه
    أتخن منَّك بيّبُوس إيدي
    يابني الشعب ده كُله عبيدي
    و أي مواطن كلب بيركع
    فتَّح عينك .. إفهم واسمع .


    لسه في بقية اسنوها
    avatar
    cute boy
    عضو ماسى
    عضو ماسى

    ذكر
    السمك عدد الرسائل : 3433
    العمر : 24
    العمل/الترفيه : basket ball player
    المزاج : feeling lovley
    تاريخ التسجيل : 18/08/2008

    إعلان رد: أمن الدولة ............. رائعة مواطن طهقان (( خش بقلب جامد )

    مُساهمة من طرف cute boy في 3rd أكتوبر 2008, 1:00 am


    المواطن
    بُص سعادتك .. أنا حَلّتها !
    شُوف أوراقي ..
    آدي بطاقتي ..
    أنا عُمرى أساساُ ما داريتها ؟!
    والمسأله لو أمن الدوله ..
    واجب نتجاوب في ساعتها
    وتبقى بسيطه وبرضه في بيتها !!


    دي تبلَّها .. تشرب ميتها .!
    يا نهار أبيض !!
    المختومة بختم النسر ؟؟!
    حتى بطاقتي يا باشا لاغيتها ؟؟
    ده أنا طول عُمري حويط ومحرَّص
    لا أتلم تحرِّي ولا أتبهدل
    أو أبات عندكو وأتجرس !!
    كُنت ف جيبي تملِّي شايلها
    زيّ هموم الدنيا .. حاملها
    بأتحنجل .. وليلاتي أنقلها
    من فوق كتفي .. لتحت بطاطي
    وأخفي ف قلبي .. و أواسى مراتي
    وأتصبَّر .. واهي ماشيه حياتي
    سارح ف الملكوت ومطاطي ..
    شكلك مش ولا بُد وواطي !.
    يا سعدتك .. بزيادة ألاطه
    وأسمع بقى منَّي على بلاطه
    ح احكيلك وضعي بإخلاص
    أنا ذقت الذُّل ف أنشاص
    أنا كنت مُقاتل ..
    أنا دُفعة تسعه وستين
    أنا راجل شقيان مش عاطل
    وعبرت تلاته وسبعين ..
    لما سعدتك كُنت بشوُرت
    أنا شلت سلاحي وعبرت
    أمن الدولة بروحي حميته
    أمن الدولة بإيدي بنيته
    كُل الدولة حدود وتراب
    من دم الشُهدا أنا حنيته
    وانا شايل فوق كتفي سلاحي
    وبقايا رجال ..
    أشلاء ف شوال
    ربَّك قدَّرني .. ولمّيتُه
    وفّيت العهد إللي قطعته
    وبروَّح بزميلي لبيته ..!
    أمن الدولة ؟؟
    أمن الدولة تهين كرامتنا ..
    وتكرَّهنا في يوم ولادتنا ؟!
    أمن الدولة تدوس ف عيالها ؟؟
    أمن الدولة إنك تغتالها ؟!
    مين نفخك وإداك السُلطة ؟
    مين عمَلَك ظابط ف الشُرطة ؟!
    قولي سيادتك ليه مغرور ؟!
    وانت بكُل جلالة قدرك
    عبد وليك تلاتين مأمور ؟؟
    ليه تفتيش .. ومباحث واقفة ؟!
    وستين بوكس وفرد مرور ؟!
    ومكرْدن كُل الميادين
    ومقفِّل شارع وإتنين
    وولاد مصر ـ براعم طالعه ـ طول السِّكه
    على الصفين
    ومطافي وشُرطه وإسعاف
    ربيتوا الرُعب في أجيالنا
    الكُل بيرجف ويخاف
    وتعطَّلوا ف مصالح ناس
    من غير تقدير أو إحساس
    إللي وراه طيارة .. تفوته !
    والمسعوف .. مين يسمع صوته !
    والمرضان .. ولا يفرق موته !
    جاي تقولي انا
    أمن الدولة ؟؟
    ممكن نفهم مع بعضينا
    معنى الأمن ؟؟
    ممكن أشرح ؟!
    من غير ما أتكلبش وأتجرَّح ؟!
    أمن الدولة قانون ورقابة ..
    أمن الدولة قضاء ونيابة ..
    أمن الدولة نظام ع الكُل
    أمن الدولة تلف سعادتك
    وتوزع بالحُب الفُل
    عز بلدنا ف أمن الدولة ..
    ضل بلدنا ف أمن الدولة ..
    العدل أساس أمن الدولة
    أي كرامة ..
    لأي مواطن دايماً أولى
    لازم يبقى البيت منصان
    ولا فيش مصري يبات عريان
    ولا واحد يتعالج بره
    وغلابه .. ببرشام ودهان
    ولا واحد يتعشى بطارخ
    والتاني من الجوع مغصان
    ولا طفل متختخ ومكلبظ
    وعيال تانية تقولش عيدان
    وقصور باشوات طول سواحلنا
    وبقية الشعب ف قفصان
    ومدارس بتديرها أمريكا
    ومدارس تانيه بتنجان
    قبل ما تطلب أمن الدولة
    عزز للدولة الأركان
    إوجد هيبة لشأن الدولة
    إرفع سيفها ف كل ميدان
    دولة تصون أولادها بخيرها
    مش تخلق منهُم خصيان !!
    دولة تفرَّحنا بموازينها
    ولا تستـثناش إبن فلان !!
    أمن الدولة يا رمز الدوله
    إنَّك تحترم الإنسان .

    هموم المواطن المصرى



    القضاء العالى عشان مصر أم الدنيا وبس
    avatar
    Raul
    ادراة المنتدى
    ادراة المنتدى

    ذكر
    عدد الرسائل : 9950
    العمل/الترفيه : Veterinarian
    تاريخ التسجيل : 20/01/2008

    إعلان رد: أمن الدولة ............. رائعة مواطن طهقان (( خش بقلب جامد )

    مُساهمة من طرف Raul في 3rd أكتوبر 2008, 4:52 am

    وأحلف لك :
    م الليلة..
    مش حخرج تاني
    صدقنى .. وديني
    وأيماني
    غير بس أدوَّر ع اللقمة
    ورغيف العيش
    هو ده اللي بيحصل من المواطن المصري
    تسلم ايدك يا كيوت
    avatar
    cute boy
    عضو ماسى
    عضو ماسى

    ذكر
    السمك عدد الرسائل : 3433
    العمر : 24
    العمل/الترفيه : basket ball player
    المزاج : feeling lovley
    تاريخ التسجيل : 18/08/2008

    إعلان رد: أمن الدولة ............. رائعة مواطن طهقان (( خش بقلب جامد )

    مُساهمة من طرف cute boy في 3rd أكتوبر 2008, 5:02 am

    ميرسي يا مي على الرد

      الوقت/التاريخ الآن هو 24th نوفمبر 2017, 2:06 am